Эрзя

Пелевень арсемат


Садо эрзят садо ялгат
Вейсэнь моро моратано!
… Вейсэ эрзят мазыйтяно,
Вейсэ эрзят виевтяно.
Маризь Кемаль




А сы удомась кодаяк. Ёмась сэтьмем. Мезть мартом?
Нолдыя арсимашинасонть, тошказь, (киньгак а пултамс) «Вирев молян», эрзянь ине моронть. Кунсолан.
Аволь ансяк моронть. Мородонть башка, марян, терди та-ки эйсэнь, ды валонзо а марявить парсте, а чарькодевить. Солыть тусто, чопода венть коштсонть. Арсян…
Тиринь келем!
Неян, кода яттнэ лаксить тенть кандолаз. Лексить …
Кенярдозь капшавтыть тонть куломанть.
Ды эйкакшот ютксояк муевсть лездыцят…
Нетнеяк учить зярдо мадстявттадызь те кандолазонтень.
Ундо седейть. Чаво прят!!!
Сынь нать а содыть те кандолазонтень тонть а кельгемадонть?!!!
Нама! Cынь онкстызь тонть кувалмот, сэреть, келей рунгот!
Ды мезе, те онкстамосонть?
Тевенть теизь, эсь, вишка, сеськень оймесэст, сийшка ёжосост, пелкапряшка мельсэст.
Ды а содытькак сынь тондеть мезеяк?!
Зярдояк а онкстави суксонтень масторонть келезэ, Раторонть кувалмозо, ёндолонть сэрезэ!
Теке, лаксить… Лексить…
Сынь а содыть тонть келеденть, кона весе мастордонть седе келей!
Сынь а содыть тонть кувалмодонть, кона весе лейтнень, вейс поводезьгак, седе кувака!
Сынь а содыть тонть сэрденть, кона менельс ды седе тов кепедеви. Тештес!
Сынь а содыть тонть домкачиденть, иневедтнесэяк истямо арась.
Лексить… Лаксить…
Зняро ульнесть истят калмицят -лаксицят?!
Косот сынь?
Ёмасть чоподас, леместкак ламонь эзть кадово.
Ды тиринь келесь эри! Келенек моры! Келенек кирдеви!
Келесь соды: - учовить тензэ эйкакшонзо! Пурнавить сынь перьканзо, цёрат ды тейтерть! Ды нежедьсызь сонзэ виев кедьсэст, ды кепедьсызь сонзэ верев, ды туи парсте седе тов Эрзянь Кельсэ Кортыця Раськенть эрямозо…
Те коесь истямо!
Лиякс - кодаяк!
Кельтеме арась Раське. Раськевтеме арась тиринь Масторось.
Эсь Мастортомо арась уцяскав эрямось.
Арась, ялгат! Арась…
Содан, кортыть: -шабра пиресэяк муеви ярсамопелесь!
Нама муеви…
Вардотненень!
Ней арсян лексицятнеде ды мизолдан, кодат пезерят!
Ды маряви тусто вень чоподастонть, седейс токиця вайгель, ды валтнэ ней парсте чарькодевить монень: -эрзят, эйкакшон, косотадо? Ков вети эйсэнк а оймавикс седеенк, кува кантнить эйсэнк а сизиця пильгенк, мезть теить важодиця кеденк? Кадынк тевенк аламос! Садо! Садо идимизь, тынк тиринь келенть! А кирдеван ськамон.
Чуди вайгелесь, теке торамань гайгемадо мейле сульть. Чуди вальмаванть кудос, пешти оймень, ды маряви, гайги потстон. Конясынь сельмень, ды тошкан – энялдан: Инешки Паз, лездак, эсь Раськентень! Шкась сась! Пелян, седе тов, талай ули лездамс…
Ды маряви, кода кепедевить, васолдо–васоло, ламо ломанень вайгельть: - Стядо, эрзят!!! Стядо, ялгат! Морасынек вейсэнь моронть вейсэ!!!
Ды кемеви –чарькодеви: - аволь ансяк монень пачтязь те вайгелесь.
Шожда варминесь налксезь токадизе шаршавонть, экше кедьсэ, теке авам та коли, вадяшинзе прячерем.
Чилисема ёно ашолгадсь менелесь, ды содан, курок чинь налнэтне прядсызь вень чоподанть.
Ушодови чись.


04.12.2011, Боляень Сыресь, Кияв ош